شغلتها !!!!! والله شغلتها
أيوه شغلتها ، إزاى ماعرفش ! بس شغلتها بعد يومين من تشغيل كل حاجة ممكن تشغيلها وأهى أخيراً شغالة تـمــــــــام
ده بس أقول إيه واحد قريبى ربنا يخ... قصدى ربنا يخليهولنا يا رب هو ده انا خلاص كنت اتجننت، وآخر برج فى عقلى طار ومن سلاكوير لفيدورا كور 4 يا قلبى لا تحزن أنا كان مالى والهماللى أشار على باقتحام عالم اﻷوبن سورس وكل ما أنزل توزيعة يبلينى بواحدة أنقح منها لما خلاص أنا تهت وصبحت مافيش
وآخر توصية من توصياته العبقرية كانت تنزيل الفيدورا بعد سنة من الشغل اللذيذ مع السلاك قررت أجرب وعينك ما تشوف الا النور اتهفيت فى عقلى ودخلت حملت شوية كتب معظمها سى إتش إم، وماله !!! الزبون قالى البرنامج بتاع ملفات السى إتش إم بينزل تلقائى مع الفيدورا. أدور على البرنامج مافيش برنامج أجرب اليم اللى خنقنى بالكلام عن جماله وفعاليته مش راضى يجيب حاجة وهكذا قضيت يومين أسود من قرن الخروب أدور على حاجة تشغل السى إتش إم وأحمل فى آر بى إمز، ويا خرابييييييييييي كل دى ليبات البرامج محتاجها ده أنا كنت فى خلاص قربت أغرق فى مستنقع الليبز وبعد تحميل التالى- xchm
- gnochm
- kchm
- kchmviewer
وبعد مشاهدة الكثير من رسائل الخطأ الغير مفهومة مثل التى تطلب مكتبة للأكس 11 يا نهار يا نهار ده كله إلا اﻷكس أنا ما بحبش أزعله أبدأ وأول ما بيضرب بشيل اللينكس كله ولو طولت بأيدى اللى برمجوه وعملوه حادعوهم إلى وليمة وأعملهم مذبحة القلعة 2005 زى أنكل محمد على ما عمل فى المقاطيع المماليك. كنت خلاص فقدت اﻷمل وبعدين وأنا بدور لقيت آر بى أم للبرنامج التالت بس كانت بتاعة ريد هات انتربرايس قلت فى بالى ، لا مش حاينفع برضه أكيد فى اختلاف ولو بسيط بينه وبين الفيدورا قامت اﻷنا العليا ردت عليا وقالت لى ما تجربى يا ضنايا وأنت خاسرانا حاجة؟
وإذا فجأة باشغل البرنامج بيأس لقيته اشتغل .... آه والله اشتغل وعقبال الجميع عشت وشفت السى إتش إم على الفيدورا كور 4 ويا رب يدينى طولة العمر وأعرف أشوف الحاجات كلها شغالة على المحروس اللينكس
وإذا فجأة باشغل البرنامج بيأس لقيته اشتغل .... آه والله اشتغل وعقبال الجميع عشت وشفت السى إتش إم على الفيدورا كور 4 ويا رب يدينى طولة العمر وأعرف أشوف الحاجات كلها شغالة على المحروس اللينكس
ودى كانت نهاية بديعة مصابنى" على رأى واحدة صاحبتى قوى "
